{login}

Navoiy viloyati arxiv ishi hududiy boshqarmasi tizimidagi arxiv muassasalari rahbar va xodimlari attestatsiyadan o’tkazildi.

Yangiliklar

"O’zarxiv" agentligining 2020 yil 7 yanvardagi 8sh-son buyrug’i ijrosini ta’minlash yuzasidan 2020 yil 22 yanvar kuni Navoiy viloyati arxiv ishi hududiy boshqarmasi tizimidagi arxiv muassasalari rahbar va xodimlari attestatsiyadan o’tkazildi. Attestatsiyada "O’zarxiv" agentligi mas’ul xodimi O.Suyunov, viloyat hokimligi vakili O.Nurmamatov, Davlat muassasalari va jamoat xizmati xodimlari kasaba uyushmasi Navoiy shahar Kengashi raisi H.Razaqov, Axborot texnologiyalari va kommunikatsiyalarini rivojlantirish vazirligi Navoiy viloyati hududiy boshqarmasi mutaxassisi A.Narziyev va Bandlik bosh boshqarmasi vakili A.Abdiyevlar ishtirok etdi. Attestatsiya jarayonida shaffoflikni ta’minlash maqsadida video va ovoz yozish moslamalari yordamida yozib olindi. Rus va qozoq millatiga mansub xodimlarga qulaylik yaratish maqsadida suhbat jarayoni tarjimonlar ishtirokida o’tkazildi. Attestatsiyadan barcha rahbar va xodimlar muvaffaqiyatli o’tdi.

 

Navoiy viloyati arxiv ishi hududiy boshqarmasi axborot xizmati.



O‘zbekiston Respublikasi Prezidenti Shavkat Mirziyoyevning Oliy Majlisga Murojaatnomasi

Yangiliklar

Hurmatli deputatlar va senatorlar! Aziz yurtdoshlar! Muhtaram mehmonlar! Xonimlar va janoblar! Jonajon O‘zbekistonimiz yangi o‘n yillikka qadam qo‘ymoqda. Erishgan natijalarimiz tarixga aylanib, oldimizda yangi-yangi o‘zgarishlarni amalga oshirish bo‘yicha ulkan vazifalar va imkoniyatlar paydo bo‘lmoqda. Shu bois, bugun Sizlar bilan birgalikda mamlakatimizni 2020 yil va kelgusi 5 yilda rivojlantirish bo‘yicha, ustuvor yo‘nalish va vazifalarni belgilab olishimiz lozim. Yaqinda "Yangi O‘zbekiston – yangi saylovlar” shiori ostida bo‘lib o‘tgan saylovlar natijasida respublikamizda demokratik islohotlarni yuqori bosqichga olib chiqish uchun zarur bo‘lgan yangi siyosiy muhit vujudga keldi. Saylovlar ochiq-oydin, xalqaro standartlar asosida o‘tkazilishini nazorat qilish uchun 50 ga yaqin davlatdan hamda 10 ta xalqaro tashkilotdan 825 nafar kuzatuvchi ishtirok etdi. Birinchi marta Yevropada Xavfsizlik va hamkorlik tashkilotining Demokratik institutlar va inson huquqlari bo‘yicha byurosining 316 kishilik to‘laqonli missiyasi bilan yaqin hamkorlik qildik. Xalqaro kuzatuvchilar saylovlar erkin raqobat muhitida, siyosiy partiyalar o‘rtasidagi qizg‘in tortishuv va bahs-munozaralar sharoitida o‘tganini, bu jarayonda ommaviy axborot vositalarining roli sezilarli darajada oshganini alohida e’tirof etdilar. Barcha xalqaro kuzatuvchilarga saylov jarayonlari haqidagi xolis fikrlari va tavsiyalari uchun butun xalqimiz nomidan samimiy minnatdorchilik bildiraman. Biz albatta ushbu tavsiyalarning har birini chuqur o‘rganib, tegishli dastur qabul qilib, amaliyotga keng joriy etamiz. Bu borada saylov komissiyalari va aholining saylov madaniyatini yuksaltirish, siyosiy partiyalarning o‘z elektorati bilan ishlash tizimini yanada takomillashtirish, partiyalarning siyosiy faolligini oshirish oldimizda turgan muhim masalalardan biridir. Shu bilan bir qatorda, mahalliy kengashlarga saylov o‘tkazishning uch pog‘onali tizimini optimallashtirish, bunda tuman va shahar saylov komissiyasining rolini oshirishga alohida e’tibor qaratish lozim. Parlament va Markaziy saylov komissiyasi saylov yakunlari bo‘yicha rejalashtirilgan vazifalarni amalga oshirish uchun yaqin hamkorlikda ish olib borishi zarur bo‘ladi. Barcha deputat va senatorlarga, ularning timsolida butun O‘zbekiston xalqiga murojaat qilib aytmoqchiman: demokratik islohotlar yo‘li – biz uchun yakkayu yagona va eng to‘g‘ri yo‘ldir. Bu borada biz har kuni izlanishdamiz, xorijdagi ilg‘or tajribalarni chuqur o‘rganib, hayotimizni, ish uslubimizni yangilashga harakat qilmoqdamiz. Biz yangi O‘zbekistonni xalqimiz bilan birgalikda barpo etamiz, degan ulug‘vor maqsadni o‘z oldimizga qo‘yganmiz. Bu borada "Jamiyat – islohotlar tashabbuskori” degan yangi g‘oya kundalik faoliyatimizga tobora chuqur kirib bormoqda. Islohotlarning amaliy natijadorligini oshirishda, joylarda yangi tashabbuslarni ilgari surishda aholimizning yanada faolroq, yanada tashabbuskor bo‘lishiga erishmog‘imiz lozim. Eng asosiysi, bu islohotlar natijasida xalqimiz uchun farovon va munosib turmush sharoitini yaratib berishimiz kerak. Odamlarimiz yetarli daromad topishi uchun eng qulay biznes va investitsiya muhitini shakllantirib, yangi-yangi korxonalar va ish joylarini ko‘paytirishimiz zarur. Bu g‘oyat dolzarb ishlarni o‘zimiz qilmasak, hech kim bizga chetdan kelib qilib bermaydi. Xalqimiz shuni yaxshi bilishi kerak: oldimizda uzoq va mashaqqatli yo‘l turibdi. Barchamiz jipslashib, tinimsiz o‘qib-o‘rgansak, ishimizni mukammal va unumli bajarsak, zamonaviy bilimlarni egallab, o‘zimizni ayamasdan oldinga intilsak, albatta, hayotimiz va jamiyatimiz o‘zgaradi. Men bunga qat’iy ishonaman va bu fikrni sizlar ham qo‘llab-quvvatlaysizlar, deb o‘ylayman. Hurmatli qo‘shma majlis ishtirokchilari! Xalqimizning fidokorona mehnati bilan 2019 yil – "Faol investitsiyalar va ijtimoiy rivojlanish yili”da salmoqli natijalarga erishdik. Barcha sohalardagi ijobiy natijalar qatorida investitsiyalar hajmi ham sezilarli darajada oshdi. Ayniqsa, to‘g‘ridan-to‘g‘ri xorijiy investitsiyalar 4,2 milliard dollarni tashkil etib, 2018 yilga nisbatan – mana shu raqamga e’tiboringizni qaratmoqchiman – 3,1 milliard dollarga yoki 3,7 barobar o‘sdi. Investitsiyalarning yalpi ichki mahsulotdagi ulushi 37 foizga yetdi. Mamlakatimiz ilk bor xalqaro kredit reytingini oldi va jahon moliya bozorida 1 milliard dollarlik obligatsiyalarini muvaffaqiyatli joylashtirdi. Iqtisodiy hamkorlik va rivojlanish tashkiloti tomonidan O‘zbekistonning kreditga doir tavakkalchilik reytingi oxirgi 10 yilda birinchi marta yaxshilandi. Energetika, neft-gaz, geologiya, transport, yo‘l qurilishi, qishloq va suv xo‘jaligi, ichimlik suvi va issiqlik ta’minoti hamda boshqa qator tarmoqlarda chuqur tarkibiy islohotlar boshlandi. Sanoatning 12 ta yetakchi tarmog‘ida modernizatsiyalash va raqobatdoshlikni kuchaytirish dasturlari jadal amalga oshirilmoqda. Natijada o‘tgan yili iqtisodiy o‘sish 5,6 foizni tashkil etdi. Sanoat mahsuloti ishlab chiqarish hajmi 6,6 foizga, eksport – 28 foizga ko‘paydi. Oltin-valyuta zaxiralarimiz 2019 yil davomida 2,2 milliard dollarga ortib, 28,6 milliard dollarga yetdi. Qishloq xo‘jaligida fermer va dehqonlarning manfaatdorligini oshirish borasidagi o‘rganish va izlanishlarimiz davom etmoqda. Sohaga ilg‘or texnologiyalar va klaster tizimi joriy etilmoqda. Tadbirkorlikni keng rivojlantirish va bu soha uchun yangi sharoitlar yaratishga barcha imkoniyatlarimizni safarbar etyapmiz. "Har bir oila – tadbirkor” dasturi doirasida o‘z biznesini boshlayotgan oilalarga 5,9 trillion so‘m kreditlar ajratildi. Yangi soliq siyosati doirasida ish haqiga soliq yuki 1,5 barobar kamaytirildi. Natijada rasmiy sektorda ishlayotganlar soni yil davomida 500 mingtaga ko‘paydi. Qo‘shilgan qiymat solig‘i stavkasi 20 foizdan 15 foizga tushirildi. Buning hisobidan o‘tgan yili soliq to‘lovchilar ixtiyorida 2 trillion so‘m qoldi. Joriy yilda bu raqam 11 trillion so‘mni tashkil etishi kutilmoqda. Bir yilda tadbirkorlar ixtiyorida shuncha mablag‘ qolishi, albatta, ularga o‘z bizneslarini rivojlantirish uchun juda katta qo‘shimcha imkoniyatlar yaratadi. Islohotlarimiz natijasida o‘tgan yili 93 mingta yoki 2018 yilga nisbatan qariyb 2 barobar ko‘p yangi tadbirkorlik sub’ektlari tashkil etildi. Jahon bankining "Biznes yuritish” reytingida 7 pog‘ona ko‘tarilib, biznesni ro‘yxatga olish ko‘rsatkichi bo‘yicha dunyoning 190 ta davlati orasida 8-o‘rinni egalladik va eng yaxshi islohotchi davlatlar qatoridan joy oldik. Shuningdek, 86 ta davlat fuqarolariga vizasiz va 57 ta davlat fuqarolariga soddalashtirilgan viza rejimi joriy etilishi natijasida o‘tgan yili yurtimizga 6,7 million nafar xorijiy sayyoh tashrif buyurdi. Bu 2016 yilga nisbatan 4,7 million nafarga yoki 3,3 barobar ko‘p demakdir.ozbekiston-respublikasi-prezidenti-shavkat-mirziyoyevning-oliy-majlisga-murojaatnomasi.docx [44.21 Kb] (yuklab olingan: 2)

100 yoshingiz muborak!

Yangiliklar

Navoiy viloyati arxiv ishi hududiy boshqarmasi va uning tizimidagi arxiv muassasalari xodimlari O’zbekistonda arxiv tizimi tashkil topganligining 100 yilligi arafasida 100 yoshga to’lgan Qiziltepa tumani, Varozun mahallasi, Varozun qishlog’ida yashovchi Uroqova Muharram ayaning xonadoniga tashrif buyurdilar. M.Uroqova bir asrlik hayoti davomida 8 nafar farzandni voyaga yetkazgan bo’lib, bugungi kunda 28 nafar nabiralarning va 100 dan ortiq chevara-evaralarning sevimli buvisi hamdir. Viloyat arxiv muassasalari xodimlari Muharram ayani ushbu qutlug’ yosh bilan muborokbod etib, esdalik sovg’alarini topshirdilar.

Muharram aya o’zining bir asrlik hayotidagi ibratli xotiralarni yoshlar bilan o’rtoqlashdi hamda suhbat yakunida viloyat arxiv xodimlariga o’z minnatdorchiligini bildirib, sohani yanada ravnaq topishini so’rab duolar o’qidi.

NAVRO’Z SHUKUHI!

Yangiliklar

Fasllar kelinchagi bo’lmish bahor faslining ziynatini o’zida mujassam etgan, zahmatkash bobodehqonlarimizu, mirishkor chorvadorlarimizning shu bilan birga mehmondo’st va qalbidaryo xalqimizning eng e’zozli, asriy qadriyatlarni o’zida jam etgan ezgulik va saxovat, go’zallik va nafosat bayrami bo’lmish – NAVRO’ZI OLAM shukuhi mamlakatimizda barq urib kezayotgan kunlarda yurtimiz bo’ylab bayram tadbirlari nishonlanmoqda. SHu qatorida Navoiy viloyati arxiv ishi hududiy boshqarmasida ham ushbu ulug’ ayyomni ko’tarinki ruhda nishonlash maqsadida bugun tongda viloyat davlat arxivi binosida qur’on tilovat qilinib, kechasi bilan tayyorlangan xalqimizning milliy taomlarida hisoblangan Halim taomi tadbir ishtirokchilariga tortiq etildi.

SHuningdek, tadbirda Navoiy viloyati arxiv ishi hududiy boshqarmasi yoshlar ittifoqi yetakchisi va yosh xodimlar ishtirokida milliy urf-odatlarimiz aks etgan milliy raqslar, kelinsalom, aytishuv kabi sahna ko’rinishlari davraga ko’tarinki ruh bag’ishladi. Milliy hunarmandchilik, kashtachilik namunalari hamda milliy taomlar ko’rgazmasi tashkil etilib, tadbir ishtirokchilariga taqdim etildi.

BO'LIMLAR